പ്രണയദിനം

ഇന്ന് പ്രണയ ദിനമാണ് വരൂ നമുക്ക് പ്രണയിക്കാം.....
ഈ പനിനീര്‍പ്പൂവ് സ്വീകരിക്കുക.
ഹൃദയത്തോളം ചുവപ്പിതിനില്ലെങ്കിലും,
ഇതെന്റെ പ്രണയമാണ്.
ഈ വര്‍ഷവും ജന്മദിനം ഓര്‍ക്കാതെ കടന്നു പോയി.
ജന്മദിനം പോലെയല്ല പ്രണയദിനം
അത് രണ്ടു പേരുടെതാണ്‌.
അത് കൊണ്ട് നമുക്കിന്നു തന്നെ പ്രണയിക്കണം.
കഴിഞ്ഞ വിഷുവിനു കണിയൊരുക്കി അമ്മ വിളിച്ചിട്ടും
പോകാന്‍ പറ്റിയില്ല.
വിഷു ദിനം പോലെയല്ല പ്രണയദിനം
നിന്റെ sms കണി കണ്ടാണ്‌ ഞാനിന്ന് ഉണര്‍ന്നത്.
ഇന്ന് പ്രണയ ദിനമാണ്.
നമുക്ക് ഇന്ന് തന്നെ പ്രണയിക്കണം.
നാളെ നീയെന്നോട്‌ പ്രണയം ചോദിക്കരുത്
പ്രണയം മുഴുവന്‍ ഞാന്‍ ഇന്ന് തന്നെ നിനക്ക് തരും.
നാളെ എന്‍റെ ചരമദിനമാണ്‌
പ്രണയദിനം പോലെയല്ല ചരമദിനം.
അത് ഒരാളുടെതാണ്,
എങ്കിലും നാളെ നീയെനിക്കൊരു പനിനീര്‍പ്പൂ തരുമോ...?